મા બાપ માટે લાલબત્તી કીસ્સો, બાળકની શ્વાસનળીમાં સિંગદાણો ફસાયો અને ફૂટબોલની જેમ ફૂલવા લાગ્યો
ભાવનગરનાં મહુવાના એક બાળકની તબિયત અચાનક લથડી હતી. બાળકનું શરીર ફુલવા લાગ્યુ હતુ, આંખ,ગળું સહિત આખા શરીરમાં જાણે કે હવા ભરાઇ ગઇ હતી. બાળકનું શરીર ફુટબોલનાં દડા જેવુ થઇ ગયુ હતુ. બાળકનાં માતાપિતા તેને ભાવનગરની હોસ્પિટલમાં સારવાર માટે લઈ ગયા બાદ બાળકનું સિટીસ્કિન અને એક્સ-રે કરાવ્યા હતા.પરંતુ કારણ ન મળ્યું એટલે બાળકને અમદાવાદ સિવિલ હોસ્પિટલમાં લઈ જવાનું કહ્યા બાદ સીવીલ હોસ્પિટલમાં તબીબોએ આ બાળકને નવજીવન આપ્યું હતું.
મહુવાથી આવેલા બાળકને સિવિલ હોસ્પિટલમાં દાખલ કર્યો હતો પરંતુ બાળકને કંઈ પણ સારવાર કરવી ઘણુ રિસ્કી હતુ. સિવિલ હોસ્પિટલનાં ડોકટરોએ તેની તપાસ શરુ કર્યા બાદ બ્રોન્કોસ્કોપી કરવાનુ નક્કી કર્યુ હતુ. પરંતુ બાળકને એનેસ્થેસિયા આપવું રિસ્કી હતુ. એટલે તેના માતા પિતા સાથે વાત કરીને ડોકટરોએ રિસ્ક લીઘુ હતું.
બાળકનાં શરીરમાં દૂરબીન નાખતા ડોકટરને માહિતી મળી કે, બાળકનાં ડાબી બાજુના ફેફસામાં શિંગનો દાણો ફસાયેલો છે. ત્યાર બાદ શિંગનો દાણો કાઢવામાં આવ્યો હતો.અને બાળકની શ્ર્વાસનળીમાંથી દાણો બહાર કાઢતાની સાથે બાળકની તબિયત સુધરવા લાગી હતી અને બાળક સ્વસ્થ થયો હતો.
મહુવાનાં બાળકની શ્ર્વાસનળીમાં શિંગનો દાણો જતો રહ્યો છે તે તેના માતા પિતાને પણ ખબર ન હતી જેના કારણે બાળકની તબિયત લથડી હતી. જેના કારણે બાળકે મોટી તકલીફ વેઠવી પડી હતી. અને માતા પિતાએ એક હોસ્પિટલથી બીજી હોસ્પિટલનાં ધક્કા ખાવા પડ્યા હતા.પરંતુ આ કિસ્સો માતા પિતા માટે લાલબતી સમાન છે કારણકે બાળકો રમતા હોય કે કંઈ પણ ખાતા હોય ત્યારે ખાસ બાળકોનું ધ્યાન રાખવુ જરૂરી છે.
અલ્પેશ રાઠોડ (અમદાવાદ)
