જૂનાગઢ પોલીસે નાના બેંક કર્મચારીને માતબર રકમ પરત અપાવી, લોભ લાલચથી બચવા સંદેશો આપ્યો

જૂનાગઢ રેન્જના આઈજીપી શ્રી મનીંદર પ્રતાપ સિંહ પવાર તથા જૂનાગઢ પોલીસ વડા શ્રી રવિ તેજા વાસમ શેટ્ટી દ્વારા જૂનાગઢ જિલ્લામાં સામાન્ય પ્રજાના લોક માનસ ઉપર પોલીસની એક સારી છાપ પડે અને “પોલીસ પ્રજાનો મિત્ર છે” એ સૂત્ર સાર્થક બને તેવા પ્રજા કલ્યાણ તથા પ્રજા ઉપયોગી કાર્યવાહી કરવા જિલ્લાના તમામ પોલીસ અમલદારોને સૂચના કરવામાં આવેલ…_

હાલના સાંપ્રત સમયમાં લોભ લાલચમાં આવી, રૂપિયા ગુમાવવાના ઘણા બનાવો પણ બનતા રહેતા હોય છે. તાજેતરમાં જુનાગઢ શહેરના સી ડિવિઝન પોલીસ સ્ટેશન ખાતે પણ કમિશનના લોભમાં રાજુભાઈ (નામ બદલાવેલ છે) નામના યુવાન ઉપર પડેલ વિપરીત અસર અંગેનો એક કિસ્સો બહાર આવેલ છે……._

જૂનાગઢ શહેરના ઝાંઝરડા રોડ વિસ્તારમાં રહેતા અને નામાંકિત બેંકમાં નોકરી કરતા યુવાન રાજુભાઈ કે જેઓને બેંકમાં કામ માટે અવાર નવાર આવતા કસ્ટમર સાથે આંખની ઓળખાણ થયેલ અને ઓન લાઇન મોબાઈલ મંગાવવાથી પોતાને રૂ. 1000 થી રૂ. 1500 જેટલું કમિશન મળતું હોય, રાજુભાઈને કસ્ટમર દ્વારા વિનંતી કરતા, બેન્ક કર્મચારી રાજુભાઇ દવારા મોંઘી કિંમતનો રૂ. 1,25,000/- નો મોબાઈલ ખરીદ કરાવી દીધેલ હતો. મોબાઈલ ખરીદ કરાવી દીધા બાદ કસ્ટમર એવા યુવાને બેંકમાં આવવાનું બંધ કરી દેતા, બેન્ક કર્મચારી રાજુભાઇ દ્વારા વારંવાર ઉઘરાણી કરતા મોબાઈલ પણ પરત આપેલ નહીં અને રૂપિયા પણ આપવામાં આવેલ ન હતા. છેલ્લે કસ્ટમર યુવાને બેંકના કર્મચારી રાજુભાઈને ફોન ઉપર ધમકી આપી, તારે જ્યા જવું હોય ત્યાં જા, તને મોબાઈલ કે રૂપિયા કાંઈ આપવાનું નથી, તેવું જણાવી, હાથ ઊંચા કરી દીધા હતા. બેંકના નાના કર્મચારીને પોતાની સાથે છેતરપિંડી થયાનો અને ધમકી મળતા, રૂ. 1,25,000/- ગુમાવવાનો વારો આવતા, તે જૂનાગઢ ડિવિઝનના ડીવાયએસપી પ્રદીપસિંહ જાડેજાને મળી, ગળગળા થઈને સમગ્ર હકીકત જણાવતા, સી ડિવિઝન પોલીસ સ્ટેશન ખાતે એક અરજી આપી, જાણ કરવામાં આવેલ હતી……._

સી પોલીસ સ્ટેશન ખાતે જાણ કરવામાં આવતા, જુનાગઢ ડિવિઝન ના ડીવાયએસપી પ્રદિપસિંહ જાડેજાના માર્ગદર્શન હેઠળ સી ડિવિઝન પોલીસ સ્ટેશનના પો.સબ ઈન્સ. જે.જે.ગઢવી, સ્ટાફના હે.કો. નિલેશભાઈ, આઝાદસિંહ, નારણભાઈ, ઇન્દ્રસિંહ, સહિતની ટીમ દ્વારા બેંકમાં આવતા કસ્ટમર માથાભારે યુવાન ને બોલાવી, મોબાઈલ ફોનનું રેકોર્ડિંગ સંભળાવી, પોલીસની ભાષામાં સાનમાં સમજાવી દેતા, માથાભારે બેંકનો કસ્ટમર સીધો દોર થઈ ગયેલ હતો અને પોતે રૂ. 1,25,000/- દેવા તૈયાર હોય, ઉભા ઉભા ચેક પણ બેંકના કર્મચારી રાજુભાઈને આપી દીધો હતો…._

જુનાગઢ પોલીસ દ્વારા જૂનાગઢ શહેર ખાતે બેન્ક કર્મચારીને મદદ કરી, માથાભારે કસ્ટમર યુવાન પાસેથી મોબાઈલ ફોનના બીલની માતબર રકમ પરત અપાવતા નામાંકિત બેંકના કર્મચારી ભાવ વિભોર થઇ ગયેલ હતા. બેન્ક કર્મચારી રાજુભાઇ દ્વારા જુનાગઢ પોલીસનો આભાર વ્યક્ત કરવામાં આવેલ હતો. પોલીસ દ્વારા ભવિષ્યમાં ખ્યાલ અને તકેદારી રાખવા વિનંતી પણ કરવામાં આવેલ હતી…_

આજના આધુનિક સાંપ્રત સમયમાં કમિશન મેળવવાની લાલચમાં નાના કર્મચારી ઉપર કેવી વિપરીત અસર લાવે છે…? તેં બાબતને ઉજાગર કરતો આ કિસ્સો સમાજના લોકો માટે લાલબત્તી સમાન સાબિત થયેલ છે…_

જૂનાગઢ જિલ્લાના પોલીસ અધિક્ષક શ્રી રવી તેજા વાસમ શેટ્ટી દ્વારા સકારાત્મક અભિગમ દ્વારા નાના બેન્ક કર્મચારીને માતબર રકમ પરત અપાવી, લોભ લાલચથી બચવા સંદેશો આપી, સુરક્ષા સાથે સેવાનું ઉત્તરદાયિત્વ નિભાવી, પોલીસ પ્રજાની મિત્ર છે, એ સૂત્ર જૂનાગઢ જિલ્લા પોલીસએ સાર્થક કર્યું હતું…_