ગુજરાત બ્રહ્મ સમાજ ટૂંક સમયમાં લગ્ન અને રોજગાર વિષયક એપ્લિકેશન લોન્ચ કરશે

ગાંધીનગર અને અમદાવાદની સાથે દક્ષિણ ગુજરાતને લાભ મળે તે માટે સુરતમાં પણ એક એજ્યુકેશન એકેડેમીની સ્થાપના તાત્કાલિક ધોરણે કરવાની જાહેરાત કરતાં પ્રમુખે કહ્યું હતું કે આજે બ્રાહ્મણ દિકરી અને દિકરાને રોજગારીનો પ્રશ્ન નડે છે તેથી સમાજના બેનર નીચે એક વ્યવસાયિક અને રોજગારલક્ષી પોર્ટલ અને એપ્લિકેશન શરૂ કરવામાં આવી રહી છે. સમાજના યુવાન અને યુવતિઓને નોકરી શોધવા જવું નહીં પડે, નોકરી તેમને સામેથી મળશે.

પ્રમુખ પિનાકીન રાવલે બીજી એવી જાહેરાત કરી હતી કે બ્રાહ્મણ યુવક અને યુવતિઓને સૌથી મોટો પ્રશ્ન જીવનસાથીનો સતાવે છે. દિકરા અને દિકરીને સાથો જીવનસાથી મળે તે માટે સમાજે સૌ પ્રથમ રાજ્યકક્ષાના લગ્ન બ્યુરોનું પોર્ટલ અને એપ્લિકેશન બનાવવામાં આવી રહી છે જેનું લોન્ચિંગ ટૂંકસમયમાં કરવામાં આવશે.

આ ઉપરાંત આઇટીના માધ્યમથી એક વેબપોર્ટલ બનાવવાનું શરૂ કરવામાં આવ્યું છે જેમાં સમાજને લગતી તમામ પ્રકારની સામાજીક અને લોકપયોગી પ્રવૃત્તિઓનું સંકલન કરવામાં આવશે જે સમાજના પ્રત્યેક વ્યક્તિને મદદરૂપ થશે. આ વેબ પોર્ટલ માત્ર ગુજરાત પુરતું નહીં પણ ભારત અને વિશ્વના તમામ દેશો કે જ્યાં બ્રાહ્મણ પરિવારો વસે છે તેમના માટે એક મોટું હથિયાર બનશે.  આ પોર્ટલમાં જ રોજગારીલક્ષી અને લગ્ન વિષયક એપ્લિકેશનને સ્થાન આપવામાં આવ્યું છે.

પ્રમુખે જણાવ્યું હતું કે હાલમાં ગુજરાત લેવલે કલ્ચરલ એકેડેમીની સ્થાપના કરવામાં આવી છે. તે જ પ્રમાણે પ્રત્યેક યુવક અને યુવતીઓ કે બાળકો જેમને કલા અને સંસ્કૃતિમાં રસ છે તેઓ માટે એકેડેમીનું તાત્કાલિક લોન્ચિંગ કરવામાં આવશે. તેમણે આશા રાખી છે કે સમસ્ત ગુજરાત બ્રહ્મસમાજના બેનર હેઠળ વિશ્વના તમામ બ્રાહ્મણો એક થઇને એક છત્ર નીચે આવી જશે તો દુનિયાની કોઇ તાકાત નથી કે બ્રાહ્મણોને અવગણી શકે. આવનારા દિવસોમાં બ્રાહ્મણ સંગઠન વેતવંતુ બનશે અને સમગ્ર દેશમાં ઉદાહરણ પુરૂં પાડશે.