સિસોદરા : શેરડી ભરેલી ટ્રેકટર પલટી ખાતા અકસ્માતમાં યુવાનનું કરુણ મોત

• અંદર બેસેલા મુસાફરને પણ નાની-મોટી ઇજા.
• ટ્રેક્ટર ચાલક ટ્રેકટર લઇને ફરાર

નાંદોદ તાલુકાના સિસોદરા ગામએ શેરડી ભરેલી ટ્રેકટર પલટી ખાતા ટ્રેક્ટરમાં બેસેલા મહારાષ્ટ્રના યુવાનને ગંભીર ઈજા થતાં તેનું ઘટના સ્થળે જ કરુણ મોત નીપજયું હતું, આ અંગે અકસ્માત મોત ગુના ની પોલીસ ફરિયાદ આમલેથા પોલીસ મથકે નોંધાયા છે. જેમાં ફરિયાદી સામસીગ વડીયાભાઈ વસાવા(રહે, પીપલાખુંટ, તા.અકલકુવા જી. નંદૂબાર મહારાષ્ટ્ર ) એ આરોપી ટ્રેક્ટર નંબર એમ.એચ. 39 એન 86 ના ચાલક સામે ઈ. પી. કો કલમ 379,  304 (અ ) તથા એમ.વી.એક્ટ કલમ 177,  184, 134 મુજબ ફરિયાદ નોંધી છે.

ફરિયાદની વિગત મુજબ આરોપી ટ્રેક્ટર ચાલક પોતાનું શેરડી ભરેલ ટ્રેક્ટર પૂરઝડપે અને ગફલતભરી રીતે હંકારતા ટ્રેક્ટર પલટી ખાઈ ગયું હતું,  જેમાં અંદર બેસેલા માણસોને નાની-મોટી ઇજાઓ થઇ હતી. જેમાં અંદર બેઠેલા જલસિંગભાઈ વડીયાભાઈ વસાવા (રહે, પિપલાખૂટ તા. અકલકુવા જી. નંદુબાર મહારાષ્ટ્ર )ને શરીરે ગંભીર ઈજા પહોંચી હતી જ્યાં તેનું ઘટનાસ્થળ પર જ મોત નીપજયું હતું. ટ્રેક્ટર ચાલક ટ્રેકટર લઇને નાસી જતાં તેની સામે તેને ઝડપી પાડવાના ચક્રો પોલીસે ગતિમાન કર્યા છે. આમલેથા પોલીસે અકસ્માત મોતનો ગુનો નોંધી કાયદેસરની કાર્યવાહી હાથ ધરી છે.

રિપોર્ટ : જ્યોતિ  જગતાપ, રાજપીપળા