સરકારની કબૂલાત રાજ્યમાં છેલ્લા બે વર્ષમાં 446 ખાનગી સ્કૂલોને મંજુરી અપાઈ

રાજ્યમાં ખાનગી સ્કૂલોની મોંઘી ફીને લઈ વાલીઓ હેરાન થઈ રહ્યાં છે. ત્યાં છેલ્લા બે વર્ષમાં સરકારે 446 ખાનગી પ્રાથમિક સ્કૂલોને મંજુરી આપી છે. જેની સામે માત્ર 20 જ સરકારી સ્કૂલોને મંજુરી આપવામાં આવી છે. તેની સાથે એક પણ ગ્રાન્ટેડ સ્કૂલને મંજુરી આપવામાં આવી નથી. જેની કબૂલાત સરકારે વિધાનસભામાં કરી છે. ગુજરાત સરકાર સરકારી શિક્ષણને બદલે હવે ખાનગી સ્કૂલોમાં મોંઘુંદાટ શિક્ષણ બાળકોને મળે અને ગરીબ વાલીઓને લાખોની ફી ભરવી પડે તેવી નીતિ અપનાવી રહી હોવાનો કોંગ્રેસે વિધાનસભામાં દાવો કર્યો છે.

છેલ્લા બે વર્ષમાં માત્ર બે જ ગ્રાન્ટેડ સ્કૂલોને મંજુરી

છેલ્લા બે વર્ષમાં રાજ્યમાં 187 સરકારી અને 147 ખાનગી માધ્યમિક અને ઉચ્ચતર માધ્યમિક શાળાઓને મંજૂરી આપી છે જ્યારે માત્ર બે જ ગ્રાન્ટેડ સ્કૂલોને મંજૂરી આપી છે. એકંદરે સ્કૂલોને ગ્રાન્ટેડ કરવામાં સરકાર કંજુસાઈ દાખવી રહી છે. ચોંકાવનારી બાબત તો એ છે કે, વાઈબ્રન્ટ ગુજરાતમાં આઝાદી પછીયે આજની તારીખે ૧૭ સરકારી પ્રાથમિક સ્કૂલોમાં વીજળીની પાયાની સુવિધા જ નથી. મહત્ત્વનું છે કે, ગુજરાતમાં કુલ સરકારી પ્રાથમિક સ્કૂલ 30842, ખાનગી 10925 અને ગ્રાન્ટેડ 570 છે. જ્યારે 1326 સરકારી, 5181 ગ્રાન્ટેડ અને 5138 ખાનગી માધ્યમિક અને ઉચ્ચતર માધ્યમિક સ્કૂલો છે.

ગુજરાતની 5353 સરકારી પ્રા. શાળામાં કંપાઉન્ડ વોલ નથી

ગુજરાત સરકાર ઘરે ઘરે વીજળી પહોંચાડવાના દાવા કરે છે પરંતુ ગુજરાતની 17 પ્રાથમિક સ્કૂલોમાં વીજળીની પાયાની સુવિધા જ નથી. મોરબીમાં ૫, દેવભૂમિ દ્વારકામાં 1, પોરબંદરમાં 7, ગીર સોમનાથમાં બે અને સુરેન્દ્રનગરનગરમાં બે સરકારી પ્રાથમિક સ્કૂલમાં વીજળીની સુવિધા નથી. આ ઉપરાંત વાઈબ્રન્ટ ગુજરાતની 5353 સરકારી અને 458 ખાનગી પ્રાથમિક સ્કૂલોમાં કંપાઉન્ડ વોલની સુવિધા નથી.

સરકારી પ્રાથમિક સ્કૂલોમાં 18 હજાર ઓરડાની ઘટ

રાજ્યના જે જિલ્લાની પ્રાથમિક શાળામાં ઘટતા ઓરડા છે તેમાં 1555 સાથે બનાસકાંઠા, 1477 સાથે દાહોદ અને 1194 સાથે પંચમહાલનો સમાવેશ થાય છે. આટલું જ નહીં સરકાર દ્વારા એકતરફ સ્માર્ટ સ્કૂલ-ગામેગામ વીજળી પહોંચાડવાનો દાવો કરવામાં આવે છે પરંતુ રાજ્યની 17 સરકારી પ્રાથમિક સ્કૂલમાં વીજળીની સુવિધા ઉપલબ્ધ નથી.

જેમાં પોરબંદરમાં સૌથી વધુ 7, મોરબીમાં 5, ગીર સોમનાથ-સુરેન્દ્રનગરમાં 2-2 અને દેવભૂમિ દ્વારકામાં ૧નો સમાવેશ થાય છે. રાજ્યમાં 5353 સરકારી અને 458 ખાનગી પ્રાથમિક સ્કૂલોમાં કમ્પાઉન્ડ વોલની પણ સુવિધા નથી. જેમાં બનાસકાંઠામાં સૌથી વધુ 692, કચ્છમાં 397, દાહોદમાં 350 સરકારી પ્રાથમિક સ્કૂલ કમ્પાઉન્ડ વોલ વિનાની છે.

પત્રકાર : ઈરફાન શેખ (પંચમહાલ )