બેચરાજી : મારૂતી સુઝુકી કંપનીનાં 200 ડ્રાઇવરો પગાર બોનસના પ્રશ્ને હડતાળ પર
- એક ડ્રાઈવરને મહિને રૂ.14800 પગારની જગ્યાએ માત્ર રૂ. 300 પગાર આવ્યો
મહેસાણા જિલ્લાના બેચરાજી તાલુકા નજીક આવેલ હાંસલપુર ખાતે મારૂતી સુઝૂકી કંપનીનો પ્લાન્ટ ચાલી રહ્યો છે તેમાં ગુરૂવારે તેમાં કામકરતા 200 ડ્રાઇવરો પગાર મામલે હડતાળ ઉપર ઉતર્યા હતા. જોકે મેનેજમેન્ટે કોન્ટ્રાક્ટ દ્વારા મિસ મેનેજમેન્ટ કરવામાં આવતું હશે તો તેની તપાસ કરીને પગલા લેવા આવશે તેવી ખાતરી આપવામાં આવી હતી.
દર મહિને હજાર-બે હજાર કાપવામાં આવે છે
આ બાબતે મારૂતી સુઝૂકી કંપનીનો પ્લાન્ટમા ડ્રાઇવર તરીકે એસપી ગૃપના હિતેન્દ્રસિંહ પરમારે જણાવ્યુ હતુ કે, છેલ્લા પાંચ વર્ષથી નોકરી કરું છું. કોઇ પગાર વધારો આપવામાં આવતો નથી. તેઓ સરકાર ધારા મુજબ નોકરી સમય 8 કલાકનો હોવો જોઇએ ત્યારે કંપની 10:30 કલાક કામ કરાવે છે. તેઓને માસિક વેતન રૂ.14800 આપવામાં આવે છે અને દર મહિને હજાર-બે હજાર કાપવામાં આવે છે. 14800 પગારમાંથી રૂ.12 હજાર રૂપિયા આપ્યા છે.
ચાલુ માસે માત્ર રૂ.60 પગાર થયો હતો
અન્ય એક ડ્રાઈવર મહિન્દ્રસિંહ સોલંકીનું કહેવું છેકે, તેમનો પગાર 14800 છે પણ આ મહિને તેમને માત્ર 300 રૂપિયા પગાર આવ્યો છે. જ્યારે બાહદુરસિંહએ જણાવ્યું છેકે, તેમને ચાલુ માસે માત્ર રૂ.60 પગાર થયો હતો. તેમજ બોન્સ રૂ.9000 જગ્યાએ રૂ.6610 આવતી હોવાથી ડ્રાઇવરો રોષ ભભુકી ઉઠ્યો હતો જેને લઇને ગુરૂવારે પ્રશ્નોને લઇને બે ગૃપના 200 ડ્રાઇવરો હડતાળ પર બેઠા હતા.
