હાલાર સહિત રાજકોટ,મોરબી અને જૂનાગઢ ના પંચાયત ના કામો ની સમીક્ષા કરતા કેન્દ્રિય મંત્રી કપિલ પાટીલ
કેન્દ્રીય મંત્રી કપિલ પાટીલે 14માં નાણાપંચ અંતર્ગત રાજકોટ, જામનગર, જૂનાગઢ અને મોરબી જિલ્લાની વિવિધ તાલુકા પંચાયતો અને ગ્રામ પંચાયતોમાં થયેલા વિકાસ કામોની સમીક્ષા કરી હતી. પંચાયતીરાજ વિભાગના કેન્દ્રીય રાજ્યમંત્રી કપિલ પાટીલ ગુજરાત રાજ્યના ત્રિસ્તરીય પંચાયતી રાજના વહીવટી માળખાથી વાકેફ થયા હતા. 14મા નાણાપંચની જોગવાઈ અંતર્ગત રાજકોટ જિલ્લાની પંચાયતોને ફાળવવામાં આવેલા રૂ.254 કરોડ અન્વયે થયેલા વિવિધ ક્ષેત્રના કામોની મંત્રી પાટીલે જાણકારી મેળવી હતી અને જે યોજના હેઠળ વિકાસ કામો કરવામાં આવ્યા હોય તે યોજનાનો ઉલ્લેખ કરતા બેનરો સંબંધિત સ્થળોએ લગાવવાના આદેશ કર્યા હતા.
• 98% કામો રાજકોટ જિલ્લામાં પૂર્ણ
રાજકોટ જિલ્લા વિકાસ અધિકારી દેવ ચૌધરીએ કેન્દ્રીય રાજ્યમંત્રી કપિલ પાટીલ સમક્ષ પાવર પોઈન્ટ પ્રેઝન્ટેશનનાં માધ્યમથી રાજકોટ જિલ્લાના વિકાસ કામોની આંકડાકીય રૂપરેખા રજૂ કરી હતી. અને ઉમેર્યું હતું કે, 21 ઓગસ્ટ સુધીમાં 14માં નાણાપંચની જોગવાઈ હેઠળના 98% કામો રાજકોટ જિલ્લામાં પૂર્ણ થઈ ગયા છે. રાજકોટ જિલ્લા પંચાયતમાં સમાવિષ્ટ વસ્તી 12 લાખ 21 હજાર 990ની છે. રાજકોટ તાલુકા પંચાયતના રૂ.26 કરોડ 67 લાખના અને જિલ્લા પંચાયતના રૂ.13 કરોડ 34 લાખના વિકાસકામો પ્રગતિ હેઠળ છે.
• અન્ય જિલ્લાના અધિકારીઓએ વિગતો રજૂ કરી
જામનગર, જૂનાગઢ અને મોરબી જિલ્લાના નાયબ જિલ્લા વિકાસ અધિકારીઓએ તેમના જિલ્લાની વિગતો પાવર પોઈન્ટ પ્રેઝન્ટેશનના માધ્યમથી રજૂ કરી હતી. આ બેઠકમાં મોરબીના જિલ્લા વિકાસ અધિકારી પી.જે.ભગદેવ, રાજકોટ જિલ્લા ગ્રામ વિકાસ એજન્સીના નિયામક જે. કે. પટેલ, મોરબી જિલ્લા ગ્રામ વિકાસ એજન્સીના નિયામક જોશી, રાજકોટના નાયબ જિલ્લા વિકાસ અધિકારી નિર્ભય ગોંડલીયા અને પંચાયત વિભાગના અધિકારીઓ ઉપસ્થિત રહ્યાં હતા.
