દર મહિને રૂ.1250ની સહાય મેળવતી રાજકોટ જિલ્લાની 54641 ગંગાસ્વરૂપા બહેનો
- ૨૧ વર્ષથી વધુ ઉંમરની અને સંતાન ધરાવતી વિધવા પણ લઇ શકે છે “ગંગા સ્વરૂપા આર્થિક સહાય યોજના”નો લાભ
નિરાધાર ગંગા સ્વરૂપા બહેનો (વિધવાઓ) સન્માન પૂર્વક તેનું શેષ જીવન જીવી શકે અને સમાજમાં તેમનું યોગ્ય પુનઃસ્થાપન થઇ શકે તેવા ઉમદા હેતુથી મહિલા અને બાળ વિકાસ વિભાગ દ્વારા ‘‘નિરાધાર ગંગા સ્વરૂપા આર્થિક સહાય યોજના’’ વર્ષ ૧૯૭૯ થી અમલમાં મુકાઇ છે. આ યોજના હેઠળ રાજકોટ જિલ્લામાં વર્ષ ૨૦૨૨માં ૫૪,૬૪૧ ગંગાસ્વરૂપા બહેનો દર મહિને રૂ.૧૨૫૦ ની સહાય મેળવી રહ્યા છે. તેમ મહિલા અને બાળ અધિકારી અવનીબેન દવેએ જણાવ્યુ હતુ.
આ યોજનાનો લાભ મેળવતાં હર્ષિદાબેન સોની કહે છે કે, મારા પતિનું દશ વર્ષ પહેલા અકસ્માતે મૃત્યુ થયું હતું. મારા દીકરાઓ મજૂરી કામ કરે છે. અમે ભાડાના મકાનમાં રહીએ છીએ. એવા કપરા સંજોગોમાં મને વિધવાઓ માટેની આ સરકારી યોજના વિશે ખબર પડતાં મેં અરજી કરી. હવે બે વર્ષથી મને પણ આ યોજનાનો લાભ મળી રહયો છે. દર માસે નિયમિત રીતે મારા બેંકના ખાતામાં રૂ.૧૨૫૦ જમા થઇ જાય છે. આ યોજનાની સહાયથી મારા જેવી અનેક મહિલાઓને અંગત ખર્ચા માટે મારે ઘરમાં કોઇ પાસે હાથ લાંબો કરવો પડતો નથી.
ગ્રામ્ય કક્ષાએ રૂ.૧.૨૦ લાખની અને શહેરી વિસ્તારમાં રૂ.૧.૫૦ લાખથી વધુની વાર્ષિક કૌટુંબિક આવક ધરાવતી ૨૧ વર્ષથી વધુ ઉંમરની અને સંતાન ધરાવતી કોઇપણ વિધવાને આ યોજનાઓનો લાભ મળવાપાત્ર છે. જે મેળવવા માટે મામલતદાર કચેરી ખાતે અરજી કરી શકાશે. આ સહાય મેળવતી લાભાર્થીનું અકસ્માતે મૃત્યુ થતાં સરકારની ગુજરાત સામૂહિક જૂથ (જનતા) અકસ્માત વિમા યોજના અંતર્ગત વારસદારોને રૂ.એક લાખ મળવાપાત્ર છે.
વિધવા સહાય મેળવનાર ૧૮ થી ૪૦ વય જૂથના લાભાર્થી મહિલાને ફરજિયાતપણે બે વર્ષના સરકાર માન્ય કોઇપણ ટ્રેડની વ્યવસાય લક્ષી તાલીમ મેળવવાની રહે છે. જેથી મહિલા પગભર બની શકે. આ યોજનાનો લાભ લેવા અરજી કરતી વખતે કુટુંબની આવક અંગેનો દાખલો, અરજદાર અને તેના બાળકોની ઉંમર અને શાળા છોડયાનું પ્રમાણપત્ર, અરજદારના આધારકાર્ડ, રેશનકાર્ડ, અરજદારના પતિનું પેઢીનું નામ, રહેઠાણ અંગેનો કોઇપણ એક પુરાવો વગેરે આપવાના રહેશે.
રાજયના મહિલા બાળ વિકાસ મંત્રી શ્રીમતી ભાનુબહેન બાબરિયાના માર્ગદર્શન હેઠળ ગુજરાતમાં અનેક દીકરીઓ મહિલાઓ સશકત બને તે માટેની વિવિધ યોજનાઓનું સુચારૂ અમલીકરણ થઇ રહયુ છે. આવી મહિલાલક્ષી યોજનાઓમાં વ્હાલી દિકરી યોજના, ગંગા સ્વરૂપા આર્થિક સહાય યોજના, ગંગાસ્વરૂપા પુનઃ આર્થિક સહાય યોજના, સખી વન સ્ટોપ સેન્ટર, અભિયમ ૧૮૧ હેલ્પ લાઇન, ધર દિવડા, સુકન્યા સમૃધ્ધિ યોજાના, મહિલા શકિત કેન્દ્ર, કસ્તુરબા પોષણ સહાય યોજના, મહિલા ખેલાડીઓને સ્કોલરશીપ, કુંવરબાઇનું મામેરૂ વગેરેનો સમાવેશ થાય છે.
આલેખન – પારૂલ આડેસરા
