કેવડીયા કોલોની વિશ્વવન ખાતે દ્વિ-દિવસીય આંતરરાષ્ટ્રિય લોકનૃત્ય-સંગીત મહોત્સવ
- યુરોપખંડના લાટવીયા દેશના કલાવૃંદે લોકનૃત્ય-સંગીત ઉપરાંત ગુજરાતની નૃત્યભારતી સંસ્થાના કલાવૃંદે “શીવતાંડવ” અને “દુર્ગાતાંડવ” લોકનૃત્યની કૃતિઓથી કલારસિકોને કર્યા રસ-તરબોળ
કેન્દ્રિય વિદેશ મંત્રાલય હેઠળ ઇન્ડીયન કાઉન્સીલ ફોર કલ્ચર રિલેશન અને ગુજરાત સરકારના રમત-ગમત, યુવા અને સાંસ્કૃત્તિક પ્રવૃત્તિઓ વિભાગના સંયુક્ત ઉપક્રમે નર્મદા જિલ્લાના કેવડીયા કોલોની ખાતે યોજાયેલા દ્વિ-દિવસીય છઠ્ઠા આંતરરાષ્ટ્રિય લોકનૃત્ય અને સંગીત મહોત્સવ રમત-ગમત યુવા અને સાંસ્કૃતિક વિભાગના સંયુક્ત સચિવશ્રી ભાવેશ અરેરા, સ્ટેચ્યુ ઓફ યુનિટીના નાયબ કલેક્ટર અને નાયબ વહિવટદાર નિલેશ દુબે, નાયબ પોલીસ અધિક્ષક ચિરાગ પટેલ, ઇન્ડીયન કાઉન્સીલ ફોર કલ્ચર રિલેશન ફોરના અધિકારી સુભાષ સિંગ અને જિલ્લા યુવા વિકાસ અધિકારી પી.એ.હાથેલીયા તેમજ સ્થાનિક કલાપ્રેમી જનતા અને મુલાકાતી પ્રવાસીઓની વિશાળ ઉપસ્થિતિમાં ખૂલ્લો મુકાયો હતો.
કેવડીયા કોલોનીમાં સ્ટેચ્યુ ઓફ યુનિટીનાં નિર્માણ બાદ સૌ પ્રથમ યોજાયેલા આ દ્વિ-દિવસીય આંતરાષ્ટ્રિય લોકનૃત્ય અને સંગીત મહોત્સવના પ્રથમ દિવસે ગઇકાલે યુરોપખંડના લાટવીયા દેશના તિરુમ ગૃપના વિમ્બા રેમો દત્તના નેતૃત્વ હેઠળ ૬ કલાકારોના કલાવૃંદે લાટવીયા દેશનું લોકનૃત્ય અને સંગીતની કૃતિઓ રજૂ કરીને પ્રેક્ષકગણને રોમાંચ સાથે મંત્રમુગ્ધ કરી દીધા હતાં.
તદ્દઉપરાંત તેમની સાથે ગુજરાતની નૃત્યભારતી પરફોર્મીગ આર્ટસ ગૃપના કોરીયોગ્રાફર શ્રી ચંદન ઠાકોરના નેતૃત્વ હેઠળની ૧૬ જેટલાં કલાકારોએ ગુજરાતની વિવિધ સંસ્કૃત્તિને વણી લેતાં “શીવ તાંડવ” અને “ દુર્ગા તાંડવ” નૃત્ય રજૂ કર્યાં હતાં જેને ઉપસ્થિત જનમેદનીએ તાલીઓના ગડગડાહટથી કલાકારોને ભારે હર્ષોલ્લાસથી બિરદાવી તેમને વધાવી લીધા હતાં. આ પ્રસંગે સ્ટેચ્યુ ઓફ યુનિટીના નાયબ કલેક્ટર અને નાયબ વહિવટદાર નિલેશ દુબેએ આ લોકનૃત્ય સંગીત મહોત્સવમાં ભાગ લઇ કૃતિઓ રજૂ કરનાર કલાવૃંદના પ્રત્યેક કલાકારને સ્મૃત્તિ ચિન્હ એનાયત કરી કલાવૃંદને પ્રોત્સાહિત કર્યા હતા.
તસવીર : જ્યોતિ જગતાપ, રાજપીપલા
